Парижани на референдум одлучија да добијат 500 нови пешачки улици

Околу 65,96 отсто од жителите на француската престолнина го поддржаа предлогот, додека 34,04 отсто беа против, според официјалните резултати од гласањето. На референдумот излегле само 4,06 отсто од гласачите.

Ова е трет референдум од ваков вид во Париз во последниве години, по оној во 2023 година со кој се забранија електричните тротинети и минатогодишниот со кој тројно се зголеми цената на паркирањето за големите теренци.

Со вчерашниот референдум ќе бидат отстранети уште 10.000 паркинг места, покрај веќе отстранетите 10.000 до 2020 година. Жителите на градот ќе одлучат кои улици ќе станат само пешачки.

Податоците од париското градско собрание покажуваат дека сообраќајот во градот е преполовен откако социјалистите ја презедоа власта на преминот во 21 век, пишува Ројтерс.