Путин до западот: Ајде на дуел, изберете цел во Киев, ќе биде интересно

Претседателот на Русија, Владимир Путин на традиционалната прес-конференција за крајот на годината одговараше и за изменетата нуклеарна доктрина.

Путин минатиот месец одобри нови услови под кои Русија ќе го употреби својот нуклеарен арсенал. Според доктрината нападот од ненуклеарни држави, поддржан од нуклеарна сила ќе се третира како заеднички напад врз Русија.

На прашањето дали Западот ја прими пораката од изменетата нуклеарна доктрина, Путин наведе: „Не знам, прашајте ги нив“.

- Ако земјите создаваат закана кон Русија, Русија верува дека има право да употреби нуклеарно оружје против нив, истакна Путин.

Тој одговарајќи на прашање за новата руска балистичка ракета Орешник, што беше употребена против Украина во ноември, посочи дека западната технологија „нема шанси“ да ја пресретне.

- Ајде да направиме експеримент или дуел. Изберете цел во Киев, донесете ја западната воздушна одбрана таму и видете дали ќе можат да ја пресретнат. Тоа ќе биде интересно за нас, истакна Путин.