Стејт департментот за сесрпскиот сабор: Лидерите од Западен Балкан треба да промовираат стабилност

По повод декларацијата усвоена во „Сесрпскиот сабор“, американскиот Стејт департмент ги повика политичките лидери од Западен Балкан подобро да ги искористат нивните состаноци со цел да се промовира регионалната стабилност и помирување.

По повод Декларацијата за заштита на националните и политичките права и заедничката иднина на српскиот народ, Стејт департментот во својот одговор до Радио Слободна Европа (РСЕ) изјави дека САД „цврсто го поддржуваат суверенитетот, територијалниот интегритет и мулти-етнички карактер на Босна и Херцеговина, чиј дел е и Република Српска.“

„Реториката и постапките на (претседателот) Милорад Додик во врска со отцепувањето на Република Српска ја загрозуваат мирната, демократска и просперитетна иднина во евроатлантските институции што ја посакуваат и заслужуваат граѓаните на БиХ, вклучително и жителите на Република Српска “ соопштија од Стејт департментот.

САД „веруваат оти иднината на сите земји од Западен Балкан е во Европската унија, во која регионалната соработка и добрососедските односи водат до поголем мир, безбедност и просперитет за сите“.

Усвојувањето на декларацијата во „Сесрпскиот сабор“, на 8 јуни во Белград, вчера го коментираше и американскиот амбасадор во Белград, Кристофер Хил, велејќи дека фокусот на сите што се грижат за Србија и нејзината иднината треба да остане на создавање на мирна и просперитетна иднина за целиот Западен Балкан и на зголемување на регионалната соработка со интеграцијата во ЕУ како крајна цел.