Започна Рута 2 од проектот „Скопје Велоград 2014-2017“

 

Рутата 2 ги опфаќа булеварите „Февруарски поход“, „Видое Смилевски Бато“, „Јане Сандански“, „Кузман Јосифовски Питу“, „Кеј 13 Ноември“, Плоштад „Македонија“, булевар „ВМРО“ и булеварот „Партизански одреди“ до Порта Влае. По булеварите велосипедските патеки ќе бидат од двете страни, додека од „Кеј 13 Ноември“ до булеварот „ВМРО“ патеката ќе биде од една страна и ќе биде двонасочна.

 

На отпочнувањето со градежни работи на патеката присуствуваа градоначалниците на Скопје и Аеродром Коце Трајановски и Ивица Коневски како и директорот на ЈП „Улици и патишта“, Синиша Ивановски

 

- Со овој проект ќе се добијат квалитетни велосипедски патеки, обележани со стандардизирана јасна и видлива хоризонтална и вертикална сообраќајна сигнализација и ќе бидат изработени од асфалт. Спуштањата на раскрсниците ќе бидат изведени од рампи, додека по должината на  патеките ќе бидат поставени заштитни столбчиња. Исто така, ќе се дислоцираат сите пречки на велосипедските патеки како што се билборди, канделабри, контејнери, сообраќајни знаци и слично, истакна Трајановски.

 

Реконструкцијата на оваа велосипедска патека е дел од капиталниот проект за подобрување на велосипедската инфраструктура во главниот град „Скопје Велоград 2014-2017“.