Четири жртви, тројца во критична состојба во судир на хеликоптери во Австралија

Во судир на два хеликоптери во Австралија загинаа четири лица, а тројца се во критична состојба, соопштија локалните власти.

„По судирот, хеликоптерите се урнаа на песочна плажа недалеку од одморалиштето Sea World“, изјави портпаролот на полицијата во Квинсленд, Гери Ворел.

Тој додаде дека на итните служби им било тешко да пристапат до песочниот брег.

Тринаесет лица се наоѓале во двата хеликоптера. Од нив четири лица загинале, тројца се тешко повредени, а шестмина се здобиле со полесни повреди, меѓу кои и исеченици од скршено стакло.

Сите повредени се пренесени во болница. Се уште не е позната причината за падот на хеликоптерот, а најавена е истрага и распит на сведоци за несреќата.