Борел: Владеењето на правото приоритет на новите власти во Црна Гора

Шефот на дипломатијата на ЕУ, Жосеп Борел, синоќа преку видео повик разговараше со црногорскиот премиер Здравко Кривокапиќ, вицепремиерот Дритан Абазовиќ, министерот за надворешни работи Ѓорѓе Радуловиќ и претседателот на Парламентот, Алекс Бечиќ, соопшти Европската служба за надворешни работи.

Во писмената изјава се наведува дека Борел му честитал на новото политичко раководство на Црна Гора и ја поздравува нивната посветеност на реформската агенда на патот кон ЕУ.

„Борел подвлече дека следните месеци треба да се искористат за напредок во политичките реформи, особено во областа на владеењето на правото“, наведува ЕЕАС.

Се додава дека Жосеп Борел го поздравил целосното усогласување на Црна Гора со позициите на надворешната и безбедносната политика на ЕУ и изрази благодарност за придонесот на Црна Гора во мисиите и операциите на ЕУ.