Културни активности во Делчево

Започнуваат низата културни активности во организација на Националната установа – Центар за култура „Никола Јонков Вапцаров“ од Делчево. Активностите, како што информираше директор на установата Методи Толевски, започнуваат со филмска проекција на најнаградуваниот македонски документарец „Медена земја“ (Honeyland), филм кој со победа во три категории на почетокот на годинава триумфираше на престижниот филмски фестивал „Санденс“.

- Вечерва со почеток од 19 часот ќе биде прикажан годинешниот македонски кандидат за „Оскар“, кој е е во трка за најдобар документарец на Европските филмски награди. Филмот „Медена земја“ ќе се прикажува во Центарот за култура во Делчево, со почеток во 19 часот. Проекцијата ќе продолжи и во текот на утрешниот ден, а како дел од филмските проекции, во наредниот период, ќе бидат прикажани и неколку филмови за помладата популација, соопшти Толевски.

Тој додава дека се вршат и последните подготовки за фестивалот „Пијанечки бисери“.

- За овој фестивал во тек се аудициите, по што ќе се пристапи кон селекција на кандидатите, кои ќе настапат во рамки на двете полуфинални вечери. Најдобрите 8 композиции од тие вечери ќе бидат дел од финалето. Овој фестивал е еден од ретките детски фестивали кој се одржува на овие простори и има за цел, да ги открие младите музички таленти од Делчево и околината, изјави Толевски.

Активностите на полето на културата, Центарот за култура „Н.Ј.Вапцаров“ од Делчево, ќе ги заокружи со организирање на Меѓународниот фестивал „Балкан без граници“, на кој традиционално учествуваат танцови групи и солисти од Македонија и Бугарија.