Општина Штип објави конкурс на тема „Европа во нашите соништа“

Општина Штип во соработка со партнерските градови од проектот „Обновена Европа“, објави конкурс на тема „Европа во нашите соништа“ во три категории: Есеј, цртеж и фотографија. Конкурсот е отворен до 31 октомври 2019 година.

Координаторот на проектот од Општина Штип, Драган Ристов на денешната прес-конференција информираше дека натпреварот е во три категории на учесници, помеѓу 7 и 13 години, 14 и 20 години и 21 до 29 години.

За секој од категориите постојат правила на конкурсот кои се објавени на веб страницата на Oпштина Штип и на профилите на социјалните мрежи на општинскиот мултимедијален центар „Киро Глигоров“ и Општина Штип.

– Секоја од земјите учеснички во проектот ќе избере по три дела во секоја категорија по завршување на конурсот и заеднички со останатите победници од другите земји, на средбата во Романија која ќе се одржи од 13 до 15 ноември, меѓународна жири комисија ќе ги избере најдобрите три дела во секоја од споменатите категории. На средбата во Романија ќе бидат избрани победниците, а една од наградите е и посета на друга земја, освен за категроијата од 7 до 13 години, вели Ристов.

Конкурсот е дел од меѓународниот проект „Обновена Европа“ кој го спроведуваат седум градови од седум европски градови, кои ја формираа иницијативата „Обединети градови“. Проектот започна во април минатата година, во Општина Аксаково во Бугарија, која е носител на истиот. Во „Обединети градови„ освен Штип и Аксаково, членуваат и Сетубал од Португалија, Нугеду Санта Виториа од Италија, Викторија од Романија, Озаров Мазовјецки од Полска и Монтсерат од Шпанија.