Во Битола фолклорен концерт за гости од ЦИОФФ за Јужна Европа

Сојузот на фолклорни ансамбли на Македонија-СОФАМ, домаќин на претставници на фолклорни асоцијации од 15 држави во Европа, членки на Светската фолклорна организација-ЦИОФФ, сектор Јужна Европа, вечер во битолскиот Центар за култура организира концерт на кој ќе настапат повеќе македонски фолклорни ансамбли и културно уметнички друштва.

Први на концертот ќе настапат членовите на Здружението фолклорна група „Копачка“ од село Драмче, Делчево кои ќе го одиграат познатото македонско оро „Копачката“ кое како што е познато во 2014 година беше прогласено за национално културно богатство и е впишано во УНЕСКО како светско нематеријално културно наследство.

-Пред гостите од 15 европски држави, како и домашна публика, одсвен ЗФГ „Копачка“ ќе настапат и Фолклорниот ансамбл „Китка“ од Истибање, ансамблите „Никола Јонков Вапцаров“, „Ибе Паликуќа“  и „Скопје“ од Скопје, ансамблот „Бојмија“ од Гевгелија и КУД „Илинден“ од Битола, информираа од СОФАМ.

Како што информираше МИА, на работните средби во Битола учествуваат 45 гости, претставници од Албанија, Азербејџан, Србија, Бугарија, Црна Гора, Грција, Кипар, Северен Кипар, Хрватска, Босна и Херцеговина, Шпанија, Италија, Португалија и Франција, членки на Светската фолклорна организација ЦИОФФ, сектор Јужна Европа.

Според програмата, учесниците денес дебатираат за повеќе теми од интерес на фолклорните групи и друштва во Јужна Европа, а ќе извршат и избор на ново раководство.

За гостите од странство домаќинот СОФАМ ќе организира посета на Националниот парк „Пелистер“, античкиот локалитет Хераклеја Линкестис, а утре ќе го посетат Охрид, градот на УНЕСКО.