Заев побара од Мицкоски јавно да го осуди 27 април, тој го стори тоа, но ги осуди и казните

Премиерот и лидер на СДСМ Зоран Заев вечерва во ТВ дуелот на Канал 5 побара од претседател на ВМРО-ДПМНЕ јавно да ги осуди настаните во Собранието од 27 април 2017 година, на што тој рече дека јавно го осудува насилството и посакува тоа повторно да не се случи, но додаде дека ги осудува и казните што ги добиле учесниците во тие настани.

-Насилството кое што се случи тој ден го осудувам и посакувам никогаш повторно да не се случи. Исто така го осудувам и чинот кој го предизвика тоа насилство, исто така го осудувам и чинот на преку два века казна дадена на луѓе кои не примениле насилство тој ден. Од друга страна имате повратници од боиштата претставници на ИСИС да добијат трипати помала казна од Горан Ангелов, Митко Чавков, Митко Пешев и останатите, одговори Мицкоски.

Заев му забележа на Мицкоски дека ги толкува пресудите и нагласи оти не е дозволиво за ниту една политичка партија да не даде јавна осуда на насилството, кое се случи во столбот на демократијата на една земја.