Нова временска прогноза

Сахарската прашина и песок како и високата влажност во воздухот условуваат биометеоролошките услови кај нас да бидат значително неповолни и сето ова придонесува граѓаните да имаат многу мачнини, вели метеорологот Славчо Попоски, додавајќи дека поради ваквата ситуација кај поголемиот број од граѓаните ќе се јави мачнина како и поспаност, можна е појава на главоболка како и повремена нервоза, но и тежина на телото и главата.

 

Температурите во моментов се повисоки од нормалните дури и за околу десет степени, а во текот на следните неколку денови ќе се искачуваат во интервалот од 10 до 17 степени, исто така и понатаму од Сахара кон нашата држава ќе се врши транспорт на прашина и на песок а поради понатамошната висока влажност во воздухот времето ќе биде доста спарно и мачно, односно температурите ќе се чувствуваат како да се повисоки од реално измерените.

 

Ноќва, особено кон утринските часови, како и утре, ќе има повремен локален дожд а има услови и за ретка појава на грмежи, услови за снег ќе има само на највисоките планински места.

 

Ваквата ситуација ќе услови и понатаму нивоата на реките и на езерата да се зголемуваат и тоа поради брзото топење на снежната покривка.

 

Во среда под влијание на северно воздушно струење ќе дува умерен, повремено засилен северен ветер а ќе има и повремени врнежи на повеќе места, врнежите ќе бидат од дожд на ниските и од снег на повисоките места и на планините, снежната граница ќе се наоѓа на надморска височина од 1200, 1300 метри, иако истата има услови да се спушти и околу па и под 1000 метри и тоа особено во среда кон крајот на денот и вечерта, вели Попоски.