Тилерсон почнува посета на арапски држави и Турција

Американскиот државен секретар Рекс Тилерсон почнува денеска посета на неколку арапски држави и Турција што ќе трае до 16 февраури. Главна цел се безбедносни прашања и борбата со тероризмот.

Во Јордан тој ќе се сретне со кралот Абдула Втори и министерот за надворешни работи Ајман Садафи каде ќе се разгледа кризата во Сирија и мировната иницијатива на Аман.

Во Анкара, Тилерсон „ќе разговара за прашања од билатералните односи“. Програмата за посетата на Анкара се уште не е  подготвена, наведуваат од Стејт департментот.

Во Бејрут тој ќе разговара со претседателот Мишел Аун, премиерот Саад Харири и шефот на Парламентот, Набих Бери.

Потврдена е средба во Каиро со претседателот Абдел Фатах ал Сиси и министерот за надворешни работи Самех Шукри.

Во Кувајт, последна држава од турнејата, Тилерсон ќе учествува на две меѓународни конференции – едната е министерски совет на држави од предводената од САД коалиција против ИД, а другата е посветена на обновата на Ирак.