Николовски и Ѓорчев во САД на средби со високи претставници на Конгресот

Пратениците од ВМРО-ДПМНЕ, Александар Николовски и Владимир Ѓорчев, во рамки на посетата на САД, во Вашингтон остварија средба во Американскиот конгрес со директорот за политика на конгресот во САД Кристофер Татл и со шефот на администрацијата на комитетот на надворешни работи на Американскиот конгрес Бенџамин Пушер.

Како што соопшти ВМРО-ДПМНЕ, станува збор за луѓе кои се дел од креирањето на политиката на американскиот Конгрес и нејзиното ефектуирање низ процесите со кои се управува.

На средбата се разговарало за достигнувањата кои ги има постигнато Македонија во повеќе области и сфери, вклучително и економијата, како и можностите за остварување на продлабочена институционална соработка и создавање добри услови за интензивирано пријателство.

По средбата, пратеникот од ВМРО-ДПМНЕ Николоски оцени дека средбата била исклучително значајна.

- Разменивме мислења околу односите на Република Македонија и САД особено во однос на стратегиската ориентација на Македонија за членство во НАТО и ЕУ, исто така разговаравме за економските достигнувања на Македонија кои што високо се ценат тука, при што Македонија е една од ретките држави од регионот која има позитивни економски резултати, разговаравме за мигрантската криза, за претстојните парламентарни избори во Македонија, како и за соработката по изборите, истакна Николоски.

На средбата е изложена поддршката што САД и ја дава на Македонија во поглед на остварувањето на стратегиската цел за членство во НАТО.

- Високо ја цениме поддршката на Американскиот конгрес, заинтересираноста и на сенаторите и на конгресмените, како и на првиот човек што ја креира политиката на Американскиот конгрес и на првиот човек на администрацијата. Се надеваме дека овие средби ќе продолжат и во иднина и американската јавност, но пред се американските политичари и оние кои ги носат одлуките, ќе имаат подобро познавање на ситуацијата на Македонија како би можеле односите уште повеќе да напредуваат, изјави Николоски.