Нетанјаху го потврди патувањето во Вашингтон

Израелскиот премиер Бенјамин Нетанјаху денеска потврди дека очекува да отпатува во Вашингтон следната недела на средби со американскиот претседател Доналд Трамп и други високи функционери.

Според неговиот кабинет, Нетанјаху на почетокот на состанокот на кабинетот објави дека ќе се сретне со Трамп, потпретседателот Џеј Ди Венс, државниот секретар Марко Рубио, секретарот за одбрана Пит Хегсет и специјалниот претставник на САД Стив Виткоф.

Нетанјаху не објасни за целта на разговорите со најважниот сојузник на Израел.

Сепак, по прекинот на огнот од 24 јуни, со кој заврши 12-дневната војна меѓу Израел и Иран, Трамп сега се залага за прекин на 20-месечните борби меѓу Израел и Хамас во Појасот Газа.

Трамп во петокот изјави дека верува оти е можен договор за прекин на огнот во Газа „во текот на следната недела“.

Војната во Газа беше предизвикана од нападот врз Израел од страна на Хамас и други екстремистички групи на 7 октомври 2023 година. Околу 1.200 луѓе беа убиени, а повеќе од 250 беа земени како заложници и киднапирани во Појасот Газа.

Оттогаш, израелската војска се бори против Хамас. Според здравствениот орган во Газа, досега се убиени околу 56.500 луѓе.

Израелските медиуми веќе објавија за планираното патување на Нетанјаху, повикувајќи се на неименувани извори.

Нетанјаху досега го посети Трамп во САД двапати од почетокот на неговиот втор мандат во јануари.