Неделава меѓународните кредитори ќе отпатуваат во Атина

Тим на меѓународните кредитори во текот на оваа недела ќе отпатува во Атина, на преговори за преразгледување на спроведните реформи од страна на Грција во рамки на програмата за спас, соопшти денеска Европската комисија.

Како што јави ДПА, согласно договореното Грција треба да спроведе радикални реформи на пазарот на трудот, на пензискиот систем, како и на колективните работнички договори, за да може да ја добие следната транша од средствата предвидени со планот за спас.     

Во соопштението на ЕК се наведува дека претставници на Европската комисија, на Европската централна банка (ЕЦБ), на Европскиот стабилизациски механизам и на Меѓународниот монетарен фонд (ММФ) во Атина ќе се сретнат со делегација на грчката Влада, за да разговараат за спроведувањето на договорените реформи.

Меѓу спорните теми на разговорите се очекува да биде и предлогот за намалување на нивото за оданочување на приходите од сегашните 8.636 евра годишно на 6.000 евра. 

Од 2010 година, па досега, меѓународните кредитори на Грција и одобрија три пакети со финансиска помош. Последниот, трет пакет на помош во висина од 86 милијарди евра на Грција и беше одобрен во јули 2015 година.  

Од оваа сума, досега кредиторите на Грција и исплатија 31,7 милијарди евра. Исплата на следната транша од помошта ќе зависи од резултатите од преговорите најавени за оваа недела во Атина.