Натпреварувачи од четири држави на меѓународниот коњички турнир „Скопје 2018“

Федерацијата за коњички спортови на Република Македонија претстојниот викенд ќе го организира меѓународниот коњички турнир „Скопје 2018“. Учество ќе земаат гости и натпреварувачи од Македонија, Албанија, Бугарија и Србија.

За прв пат турнирот се одржа во 2003 година и оттогаш традиционално се организира секоја година во чест на празникот 11 Октомври.

- Од оваа година се воведува и Меморијален куп “д-р. Јосиф Наумовски”, натпревар во чест на доајенот на коњичкиот спорт на Република Македонија, познат интернист-кардиолог и хуманист – др. Јосиф Наумовски, соопшти организаторот.

Коњичкиот турнир „Скопје 2018“ ќе се одржи на 13 и 14 октомври, на терените на коњичкиот центар „Хиподром“ од 10 до 15 часот.