Македонија
19. August 2019 - 11:12

Нападите меѓу Катица Јанева и Фатиме Фетаи, основ за нивно изземање во "Титаник 3"

Одбраната во "Титаник 3" бара изземање на специјалната јавна обвинителка Катица Јанева и нејзините полномошници кои го застапуваат предметот, односно обвинителите Фатиме Фетаи и Гаврил Бубевски.
 
Адвокатот Еленко Миланов рече дека од минатото до денешното рочиште, очигледно е оти изменети се случувањата во СЈО.
 
- Можевме да видиме дека постои конфронтација меѓу Јанева и обвинителите кои го застапуваат предметот, што претставува основ за изземање заради конфликти, спротиставени мислења, и да не бидам груб, напади меѓу Јанева и полномошниците, изјави во судницата адвокатот Еленко Миланов.
 
По ваквото барање, судијката Марија Клетничка го прекина судењето и продолжението го најави за половина час.
 
Во предметот „Титаник 3“ се обвинети Ејуп Аљими и Исмет Гури од ДУИ. Се товарат дека како членови на Општинската изборна комисија во Чаир на локалните избори во 2013 година уништувале изборен материјал.
 
Зоран Јаневски