Македонија
27. јуни 2019 - 13:58

МВР: Братот на „Ел Чека“ не е приведен

Министерството за внатрешни работи во изјава за „Порталб.мк“ ги демантираше пишувањата во медиумите дека братот на „Ел Чека“, Блерим Ахмети, бил приведен денеска.

– Тој не е приведен, само беше во полиција за да го пријави протестот што ќе се одржи в сабота – вели портпаролот на МВР, Тони Ангеловски.

Блерим Ахмети пред неколку дена беше на чело на протестот против ДУИ, кој се одржа во Мала Речица. Протестот беше против „неправдите што ги прават Албанците“ и против политичката власт.

Ел Чека на Фејсбук-профилот од крајот на минатиот месец објави неколку снимки од телефонски разговори на луѓе од врвот на ДУИ и во врвот на извршната власт.