Менди ќе отсуствува еден месец поради повреда

Левиот бек на Реал Мадрид, Ферланд Менди ќе отсуствува од три до четири недели. Причина за ова е повредата на мускулот на левата нога, која Французинот ја заработи на вчерашниот реванш осминафинален дуел во Лигата на шампионите против Атлетико Мадрид.

Овој натпревар беше 200-ти за Менди во дресот на Кралскиот клуб. Французинот беше заменет со Фран Гарсија во 83. минута од натпреварот на „Цивитас Метрополитано“.

- По извршените тестови денеска, на Ферланд Менди му беше дијагностицирана повреда на мускулот на тетивата на левата нога, се вели во соопштението на клубот.

Од „Бернабеу“ не прецизираа до кога Французинот ќе закрепнува, но според шпанските медиуми тој ќе пропушти најмалку четири натпревари на Реал Мадрид.

Целта е да биде подготвен за првиот четвртфинален натпревар од Лигата на шампионите против Арсенал, кој ќе се одигра на 8 април. Доколку се оствари попесимистичката прогноза, Менди ќе биде подготвен на 16 април.