Малчев од Бугарија: Над 500 граѓани донираа крв за настраданите, наместо ракија - салата патриотизам да градиме мостови

Во само два дена повеќе од 500 граѓани во Бугарија дарувале крв за настраданите во трагичниот инцидент во дискотеката во Кочани. Повикот на здравствените власти и црвениот крст во Бугарија дека е потребна крв за пациентите кои беа транспортирани во Македонија, собра голем број хумани граѓани во Бугарија од различна возраст. Крв се дарува во Универзитетската болница за активно лекување и итна медицина УМБАЛСП „Н.И. Пирогов“ и Националниот центар за трансфузиона хематологија. Меѓу оние кои вчера даруваа беше и Ѓорги Малчев професор и блогер, кој и самиот во повеќе наврати повика што е можно поголем број негови сограѓани да бидат хумани и да даруваат крв.

Малчев вели сите сме луѓе и како луѓе имаме должност да подадеме рака и да помогнеме кога гледаме дека нечии живот зависи од тоа.

Освен дарување крв во Бугарија во тек се и други акции за помош на луѓето кои се лекуваат таму но и за сите настрадани таму. Она што Малчев го сподели е дека тие самоиницијативно се организираат и собираат парични средства, а како самиот нагласи голем број средства се веќе собрани.

Малчев вели ова е уште еден доказ дека и од двете страни треба да престане ракија-салата револуционерството и да се градат заеднички мостови, пријателство и хуманоста преку кој ќе им помагаме на луѓето во потреба и ќе си помагаме како соседи и пријатели

Дарувањето крв во Бугарија прдолжува до крајот на оваа недела, а продолжуваат и другите хуманитарни активности за помош на настраданите во Кочани.