Македонија останува лидер во Европа по смртност од корона вирусот

Македонија останува на врвот на смртноста која ја предизвикува коронавирусот. 

Вчерашниот биланс од 10 починати е четвртиот најлош во Македонија од почетокот на кризата, откако врвот беше достигнат на почетокот на месецот кога беа регистрирани 15 жртви. Македонија и денеска е прва во Европа со 5 починати на милион жители што е речиси двојно повеќе од втората Молдавија во која вчера смртноста достигнала 2,7 жртви на милион жители. Следи Црна Гора каде вчера се регистрирани 1,9 смртни случаи на милион жители, и БиХ со 1,8 починати на милион жители. 

Само од почетокот на јули во Македонија се регистрирани вкупно 129 пациенти кои починале како последица од коронавирусот, што во просек е речиси 6 и пол жртви дневно. 

Ваквите бројки покажуваат дека само во 20 дена од јули во Македонија се регистрирани третина од вкупниот број на жртви од вирусот од почетокот на кризата. 

Во моментов во земјата како активни се водат 3946 случаи од кои најмногу, 1880 се во главниот град, 300 има во Штип, еден помалку во Тетово.