Лукашенко: Ја засилуваме армијата за никој да не може да не дестабилизира

Претседателот на Белорусија, Александар Лукашенко, денеска изјави дека неговата земја продолжува да ја засилува својата војска за никому да не му дозволи да ја дестабилизира ситуацијата и да ја наруши нејзината територијална целовитост, пренесе Танјуг.

-За жал, во арсеналот меѓународни односи еден од најважните аргументи останува воената сила. Секоја земја која се грижи за територијалната целовитост и независност мора да знае како да се заштити, рече Лукашенко.

Заради тоа, додаде тој, Белорусија продолжува да ја засилува својата војска и да ја модернизира со најнови видови вооружување, пренесоа руските медиуми.

Тој истакна дека  Белорусија го изготви најновиот реактивен систем за повеќекратен лансир на ракети „Полоњез“, што претставува еден од најважните фактори во стратешкото спречување конфликти.

Лукашенко потсети дека Белорусија продолжува да соработува со своите сојузници, пред се, со Русија, но и да води дијалог со своите соседи од Запад.