Левица: Двојазичните униформи се спротивни на Амандманот 5 од Уставот

Со стапување во сила на Уредбата за двојазичност на полициските униформ, како директна последица на т.н. Тиранска платформа, свесно се потиснувa и миноризира македонскиот јазик, кој според Уставот е службен јазик во Република Македонија.

Уставот ја предвидува употребата на македонскиот јазик и неговото кирилско писмо на целата територија на државата како службен јазик и писмо [Амандман V, т. 1 од Уставот на РМ]. Значи, секое дејствување во рамките на државата кое има унифициран карактер, т.е. кое се потпира на принципот на целовитост и територијалност мора да ја следи оваа уставна одредба.

Оваа уставна обврска се однесува и на Полицијата, која функционира врз основа на територијалниот принцип, кој неминовно ја обврзува Полицијата да функционира на територијата на целата држава уницифирано т.е. законот со кој се уредува нејзината надлежност мора да се применува потполно исто и подеднакво на целата државна територија

Со неуставната Уредба за двојазични униформи, се екстензира оваа уставна одредба до граници на неспроведливост, нарушувајќи ги основните уставни принципи на унитарност и неделивост на суверенитетот и територијалниот интегритет на Републиката. Вакво тивко истиснување на македонскиот јазик, оваа ненародна Влада направи и со воведување на двојазичните декларации на производите на територијата на РМ со новиот Закон за заштита на потрошувачите!

Со ваквите закони, уредби и мерки се нарушува принципот на унитарност и неделивост на суверенитетот и територијалниот интегритет на Републиката.

Оваа нелегитимна Влада на ДУИ и СДС, наместо заштита на унитарноста, потикнува федерализација и дејтонизација на Македонија, по примерот на Босна и Херцеговина, која е единствена европска држава со повеќејазични униформи!

Левица