Лавров не ја гледа ЕУ како соодветен партнер за мировни преговори

Рускиот министер за надворешни работи, Сергеј Лавров, не ја гледа Европската Унија како соодветен партнер за преговори за завршување на војната во Украина, јавуваат светските агенции.

Во текст објавен од руското Министерство за надворешни работи, Лавров навел дека вистинската цел на европските лидери не е преговарање со Русија, туку поддршка на украинското раководство.

„Целта е да се поддржи режимот (на украинскиот претседател Володимир Зеленски) и да се зачува како отскочна штица за продолжување на конфликтот со Русија“, се наведува во изјавата.

Претставник на Европската Унија потврдил дека во последните недели имало кратки дипломатски контакти насочени кон воспоставување комуникациски канали со Москва, но без суштински преговори.

Во својот текст, Лавров оценил и дека „обединета Европа се уште сонува за проширување“, особено на НАТО и ЕУ кон руските граници, додавајќи дека со Европа не може да се води дијалог како со неутрален набљудувач.

Тој исто така предупредил на можни реципрочни нуклеарни удари со „катастрофални последици“ во случај на директен конфликт меѓу Русија и НАТО.

Односите меѓу Москва и Брисел се сериозно нарушени од руската анексија на делови од Украина во 2014 година, а практично замрзнати по воената интервенција во 2022 година.

МИА