Ла Национале: Доктори фалсификувале медицински тестови на Астори

Од Италија доаѓа вознемирувачка приказна на весникот „Ла национе“, кој тврди дека полицијата истражува неколку доктори за фалсификување на медицинските тестови на капитенот на Фиорентина, Давиде Астори, кој почина на 4 март 2018 година.

31-годишниот Астори почина во сон во хотелска соба пред мечот со Удинезе пред повеќе од една година, и иако се појавија неколку објаснувања за неговата ненадејна смрт, сѐ уште има многу нејаснотии околу тоа како му било дозволено да продолжи со кариерата и покрај нерегуларностите на работата на срцето.

Според весникот, полицијата како главен обвинет го има професорот Џорџон Галанти, последниот лекар кој ја потпишал дозволата за игра на Астори на 10 јули 2017 година. Се тврди дека овој документ потоа бил фалсификуван на 19 април 2019 за да изгледа дека Галанти ги направил сите медицински тестови, кои не биле направени. Според овој извештај, фалсификувањето го направил соработник на Галанти во обид да ги покрие траговите на негрижа.