КУД „Дримкол“ Вевчани со целовечерен концерт вечерва во Прилеп

Под  мотото „Со песна и оро до височините“, вечерва, од 20:00 часот на платото пред Центарот за култура „Марко Цепенков“ (арт плоштад) во Прилеп, целовечерен концерт ќе одржи КУД „Дримкол“ од Вевчани.

 

Концертот е во рамките на Прилепското културно лето и е дел од програмата на ЦК „Марко Цепенков“, поддржана од Министерството за култура.

 

КУД ,,Дримкол,, од Вевчани во своето долгогодишно постоење навистина остава силен белег на македонската сцена. Секогаш е задоволство да се гледаат уметниците на ова друштво облечени во богатите Вевчански народни носии како ги презентираат на сцена преубавите Вевчански ора и обичаи отсвирани на традиционални народни инструменти.

 

Токму таквата негова автентичност му дава посебност и убавина, а сето тоа предизвикува интерес кај публиката и желба да се следи во живо програмата на Дримкол. Од тие причини одлучивме да и овозможиме на Прилепската публика целовечерна дружба со овој фолклорен ансамбал преку проектот ,,Со песна и оро до височините,, кој го предвидовме во нашата програма за работа за оваа година и истиот беше поддржан од министерството за култура – напишаа на социјалните мрежи од НУ Центарот за култура ,,Марко Цепенков,, од Прилеп.  

 

Започнува како играорна група на младинки и младинци уште во 1947 година, со текот на времето го добива името „Печалбар,, во 1978 година се преименува во „Дримкол“ и тогаш до денес континуирано и активно работи на негување и презентирање на сценско уметничките вредности со посебен акцент кон фолклорната дејност.

 

Богатата изворна вевчанска носија, изворните инструменти, изворните кореографии го прават ова друштво различно и посебно во делот на презентирањето на традиционален фолклор. Но и покрај изворниот фолклор на репертоарот на ова друштво се наоѓаат и кореогравски обработки од сите играорни подрачја на нашата држава. Друштвото денес брои 175 распоредени во организациони целини кои работат во рамките на друштвото: фолклорните ансамбли, пејчката група, изворниот оркестар, патувачки театар. КУД „Дримкол“ веќе неколку години е класифицирано како друштво од Прва категорија во рамките на Министерството за култура.