Кралот Чарлс ги собира лидерите на ВИ компаниите поради растечката загриженост за безбедноста

Британскиот крал Чарлс оваа недела ќе биде домаќин на шефовите на големите компании кои се занимаваат со вештачка интелигенција (ВИ), со цел да разговараат за потребата од заеднички принципи за развој на технологијата која предизвикува сè поголема загриженост поради потенцијалните закани по човештвото.

На состанокот ќе учествуваат раководителите на компаниите Нвидија, Гугл Дипмајнд, ОпенАИ и Антропик, како и британскиот министер за вештачка интелигенција.

Ќе се разговара за начините на кои вештачката интелигенција може да се користи за просперитет на општеството и со зачувување на човечкото достоинство, соопшти Бакингемската палата.

Извршниот директор на Антропик, Дарио Амодеи, во саботата рече дека компаниите мора да го „забават“ темпото на развој на ВИ моделите. Антропик минатата недела објави извештај за разузнавачки закани во кој беше наведено дека неколку актери ги користеле неговите Клод АИ модели за активности кои вклучуваат развој на оружје, кибер операции, надзор и измами.

Американскиот претседател Доналд Трамп вчера ги отфрли разговорите за забавување на развојот, додека кинескиот весник „Глобал тајмс“ оцени дека таквиот пристап е „прирачник од Ладната војна“ насочен против Пекинг.

Бакингемската палата соопшти дека на состанокот ќе биде разгледано како вештачката интелигенција може да биде употребена на начини кои му користат на општеството и придонесуваат за „процут и на луѓето и на планетата“.

Велика Британија, која е меѓу европските лидери во финансирањето на ВИ компании и стартапи, заговара поблаг пристап кон регулацијата на вештачката интелигенција, поблизок до американскиот отколку до пристапот на Европската Унија.

Британскиот Институт за безбедност на ВИ, основан по Самитот за безбедност на ВИ во 2023 година, добива пристап до ВИ моделите пред нивното распоредување врз основа на доброволни договори со водечките компании, што му овозможува да ги проценува нивните можности и ризици и да го следи развојот на напредните модели. 

МИА