Костовски: Обвиненијата на СЈО се правно неиздржани и без докази

ВМРО-ДПМНЕ денеска обвини дека Специјалното јавно обвинителство работи по диктат на власта и оти сите нивни случаи и обвиненија се правно неиздржани, конструирани и без докази. 

- Таргет и Тврдина се едни од случаите преку кои СЈО имаше за цел, целосно да ја изврти вистината и да ги манипулираа граѓаните. СЈО преку овие политички монтирани случаи, сакаше да претстави пред јавноста дека ВМРО-ДПМНЕ од позиција на власт сама себе се прислушувала, што е крајно апсурдно и неточно тврдење, изјави Дарко Костовски пред седиштето на СЈО.

Тој посочи дека во случајот „Тврдина“, СЈО ја лажела јавноста и оти не е направена никаква штета врз буџетот со уништувањето на старата опрема за прислушување бидејќи опремата била неупотреблива.

- Уништувањето на опремата е направено со целосно испочитувани законски процедури, при што е формирана стручна комисија која одлучувала по однос на истото. Целата постапка е извршена согласно законски предвидени процедури и тука нема апсолутно никаков доказ кој ќе го негира тоа, рече Костовски.