Косово: Петмина загинати во три сообраќајки во едно деноноќие

Три сообраќајни несреќи со смртни последици, со петмина загинати и седуммина повредени, се случија на косовските патишта од петокот ноќта до саботата на пладне.

Како што соопшти косовската полиција, ноќта меѓу петокот и саботата, околу 23 часот, во судар на два автомобили на патот Гњилане – Урошевац, загинаа две лица, а две други беа потешко повредени.

Други две лица загинаа, а три се повредени во сударот што наредното утро во 9.30 часот се случи на автопатот „Ибрахим Ругова“, во близина на градот Сува Река. Учесници во оваа сообраќајка беа патничко комбе со албански регистарски таблички и камион.

Во судар на две возила на регионалниот пат Липљан – Штимље, што се случи во саботата во 11:50 минути, загина едно лице, додека други две беа повредени.

Во првите осум месеци од годинава, од 1 јануари до 31 август, во 59 сообраќајни несреќи со смртни последици во Косово, животот го загубиле 69 лица, информира полицијата.

Во текот на цела 2018 година во Косово се случиле 100 сообраќајки со смртни последици, во кои животот го загубиле 129 лица.