Концерти и претстави во Гевгелија за Нова година

Во соработка со културно уметничките друштва, градскиот хор и училишните музички и драмски секции, општина Гевгелија на своите граѓани им подготвува богата културна програма која ќе изобилува со претстави и концерти посветени на Новата година и Дедо Мраз.

Реализацијата на програмата ќе почне на 20 декември со претставата „Спанаќ со пржени компири“ во изведба на театарот „Џинот“ од Велес, а серијата новогодишни концерти ќе ја отвори градскиот хор „Гортинија“ на 23 декември за кога е најавен и концертот на ансамблот „Бојмија“.

На 25 декември учениците од ОУ „Крсте Мисирков“ од Гевгелија пред врсниците и родителите ќе ја изведат својата новогодишна претстава, а 26 декември е термин резервиран за стенд ап комедијата на Бојан Велевски.

Гевгелиските гимназијалци со новогодишните претстави поветени на Новата година ќе настапат на 28 и 29 декември, а ден подоцна програмата чиј што покровител е општина Гевгелија, ќе заврши со традиционалниот новогодишен концерт на учениците од музичкото училиште „Васо Карајанов“.