Комисијата за европски прашања треба да почне со расправа по првиот закон за коридорите

 Собраниската Комисија за европски прашања денеска треба да ја продолжи 54. седница на чиј дневен ред се предлог-законските измени за изградба на коридорите 8 и 10д.

Законите се предложени со европско знаменце и треба да се донесат по скратена постапка.

Комисијата синоќа го усвои дневниот ред, а претпладнево, како што најави претседателот Арбр Адеми, ќе почне со расправа по првата точка - Предлог-законот за изменување и дополнување на Законот за работните односи, по скратена постапка.

На седницата се и Предлог-законот за изменување и дополнување на Законот за урбанистичко планирање, Предлог-законот  за изменување и дополнување на Законот за градење, Предлог-законот за изменување и дополнување на Законот за експропријација, како и Предлог-законот за изменување и дополнување на Законот за утврдување на јавен интерес и номинирање стратешки партнер за имплементација на проектот за изградба на инфраструктурниот Коридор 8 (делница: Тетово – Гостивар – Букојчани и проектот за автопатот Требеништа – Струга – Ќафасан) и Коридорот 10 д (делница на автопатот Прилеп– Битола) во Република Северна Македонија.

Покрај овие закони, пред членовите на Комсијата е и Предлог-законот за академија за судии и јавни обвинители кој исто така треба да се донесе по скратена постапка. 

Во Собранието се најавени седници и на Комисијата за прашања на изборите и именувања, за предлозите за избор на членови на Советот на јавните обвинители, и на Комисијата за образование и наука, за предложените измени на законите за основното образование, за основање. Национална агенција за европски образовни програми и мобилност, за отворените граѓански универзитети за доживотно учење, за просветната инспекција  и на Законот за спортска академија, сите во прво читање.