Кери: Партнерството меѓу САД и ЕУ е силно

Партнерството меѓу САД и ЕУ е многу силно, изјави американскиот државен секретар Џон Кери по средбата со министрите за надворешни работи на земјите од ЕУ, која се одржа во Брисел.

- Партнерството меѓу ЕУ и САД сега е силно. Такво ќе остане и во иднина, нагласи Кери.

Тој истакна дека соработката меѓу САД и Европа денес е поинтензивна од било кога, и сите страни, вклучувајќи го и шефот на британската дипломатија Борис Џонсон, имаат намера да има што е можно полесен премин во односите меѓу ЕУ и САД веднаш откако Британија ќе преземе чекори за излез од Унијата. 

Кери додаде дека американската Влада е одлучна уште оваа година да склучи договор за слободна трговија со ЕУ. Преговорите за Трансатлантско трговско и инвестициско партнерство се водат веќе три години меѓу ЕУ и САД. И двете страни сакаат разговорите да завршат во 2016 година.

Според него, склучувањето на договорот може да го олесни негативниот ефект од Брегзит.