ОН: Јужносуданската војска егзекутирала и малтретирала цивили

Безбедносните сили во Јужен Судан минатиот месец егзекутирале цивили и малтретирале група жени и девојчиња за време на жестоките борби во главниот град Џуба, изјави високиот комесар на ОН за човекови права, Зеид Раад ал Хусеин.

Тој побара од Владата на јужносуданскиот претседател Салва Киир виновниците да одговараат за своите злодела и ги повика големите светски сили да преземат итни мерки за прекин на насилството во најмладата држава на светот.

- Некои цивили се убиени при престрелки меѓу завојуваните страни, но за други се тврди дека биле безмилосно егзекутирани од безбедносните сили, чија главна цел веројатно се луѓето од етничката група Нуер, се наведува во соопштението на ОН.

- Регистрирани се 217 случаи на сексуално насилство во Џуба во периодот меѓу 8 и 25 јули, за време на борбите. Досега ОН документирала речиси 73 случаи на цивили, кои се убиени од безбедносните сили, но нивниот број можно е да е поголем, истакна Ал Хусеин.