ЈСП Скопје бара Владата да донесе одлука за субвенционирање на работењето на претпријатието

ЈСП Скопје денеска ја повика Владата да донесе одлука за субвенционирање на работењето на претпријатието, со оглед на зголемените цени на енергенсите во државата.

– Оваа криза бара вклучување на сите чинители во нејзино разрешување. Со оглед на тоа што е прогласена кризна состојба поради состојбата во енергетиката, на располагање се многу механизми како може да се помогне на ЈСП, oдносно на граѓаните, се наведува во соопштението од ЈСП.

Како што велат од ЈСП, врз основа на член 9-а став 6 од Законот за задолжителни резерви на нафта и нафтени деривати, Владата може да донесе одлука за отстапување на нафтени деривати без надомест на Град Скопје, а за потребите на ЈСП Скопје, како што било случај во 2020 година, кога гориво ЕУРОДИЗЕЛ БС било отстапено за потребите на оваа сообраќајно претпријатие.

– Врз основа на досегашната практика за намалување на ценовниот шок, ова може да се примени и во случајов кога имаме драстично покачување не само на цената на електричната енергија, туку и на цените на метанот, велат од ЈСП.

Оттаму пренесуваат дека побарале и да се иницираат промени во Законот за енергетика, за да може на Регулаторната комисија да ѝ се даде можност за одредено регулирање на цената на метанот во кризни ситуации.