Балкан
12. February 2018 - 8:30

Јевтиќ: Формирањето на ЗСО клуч за продолжување на дијалогот

Косовскиот министер за заедници и враќање Далибор Јевтиќ смета дека продолжувањето на дијалогот меѓу Белград и Приштина е од големо значење, а формирањето на Заеднцата на српски општини (ЗСО) неопходен чекор за продолжување на разговорите.

Како што јави дописникот на МИА, Јевтиќ ова го изјавил на средба во Вашингтон со заменик помошникот на американскиот државен секретар за Европа и Евроазија, Метју Палмер, со кого разговарале за повеќе актуелни прашања во Косово.

Тема на разговор била и положбата на Србите во Косово, при што Палмер искажал разбирање и поддршка за сите процеси кои придонесуваат за стабилност.

- Имаме многу предизвици кои не очекуваат оваа година. Треба да решиме неколку проблеми со цел целиот регион на Западен Балкан да оди напред и да стане дел од ЕУ. Поддршката на САД за постигнување мир и стабилност во Косово е од големо значење, изјавил Јевтиќ.

Тој додал дека убиството на лидерот на Граѓанската иницијатива „Србија, демократија, правда“, Оливер Ивановиќ бара одговор на прашањето кој и зошто го извршил криминалнот чин.

Двајцата соговрници разговарале и околу враќањето на расселените во нивните домови и пречките кои се појавуваат на патот за нивно враќање.