Јакимовски: Парламентарните избори успешни за ГРОМ

Предвремените парламентарни избори беа успешни за ГРОМ како политичка партија, бидејќи  во новото парламентарно собрание ќе биде претставувана со два пратеника и понатаму ќе претставува значаен чинител на политичката сцена, оцени претседателот на ГРОМ Стевчо Јакимовски на денешната седница на партискиот Централен одбор. 

Како што соопшти ГРОМ, партијата ќе работи на зајакнување на своите капацитети, со цел, како што рекол, да бидеме максимално подготвени во наредниот период во кој ни следуваат редовни локални и евунтуални нови предвремени парламентарни избори.

ЦО усвоил одлука за свикување Собрание на ГРОМ за 29 јануари следната година, а за нов претседавач на Централниот одбор е избран Зоран Петрушевски од општинската организација на ГРОМ во Куманово.

Шефот на изборниот штаб на ГРОМ за предвремените парламентарни избори од 11 месецов Љупчо Пренџов го презентирал Извештајот на ЦИШ за изминатите тринаесет месеци предизборни и изборни активности на ГРОМ.