Изгоре покрив на стар магацин на Македонски железници во Штип

Изгоре покривната конструкција на стариот магацин, кој се наоѓа во непосредна близина на Железничката станица во Штип.

Командирот на Територијалната противпожарна единица- Штип Благој Ренџов изјави дека синоќа 11 пожарникари со две противпожарни возила го гаснеле пожарот во стариот магацин.

- Се работи за опожарена покривна конструкција. Пожарот е ставен под контрола. Дежерна екипа до раните утрински часови беше на објектот, со цел да се контролира и да се догаси. Материјалната штета надлежните институции ќе ја утврдат, рече Ренџов.

Тој истакна дека на местото излегла и екипа на крим техника од СВР-Штип, која треба да ги утврди причините за пожарот. Во објектот се чувале стари предмети на Македонски железници, а штетата од пожарот е само на покривната конструкција.

- По пожарите на отворено, ова ни е прва интервенција на објект, рече Ренџов.

Штипските пожарникари според евиденцијата во текот на оваа година интервенирале на околу 220 пожари.