Избор на најдобрите иновативни решенија „Младински предизвик“

Во гимназијата „Орце Николов” во Скопје денеска ќе се одржи презентација на пет иновативни решенија на тема „Како можеме да ставиме #КрајНаНасилството врз и помеѓу децата?”, како дел од глобалното движење „GenUnlimited – Младински предизвик“.

Од петте избрани тима кои претходно освија награда од по 1000 долари почетна инвестиција за развој на идејата и менторска поддршка во изминатите три месеци, ќе се одберат две идеи коишто ќе бидат поднесени во глобалниот избирачки процес.

Процесот на евалуација треба да ги утврди младите иноватори со најголем потенцијал да создадат проекти коишто ќе го трансформираат општеството, млади коишто имаат најголема страст и мотивација да учат и да се адаптираат на потешкотиите со коишто секојдневно се среќаваат.

Публиката на настанот ќе има можност индивидуално да гласа за решението во коешто верува дека има најголем потенцијал и со тоа ќе учествува во финалната оценка со 25 проценти учество, најавија од УНИЦЕФ и СмартАп – Лабораторија за социјални иновации. Со цел фер, објективна и непристрасна селекција, учесниците во публиката ќе бидат избрани по случаен избор, овозможен од интернет услугата https://www.random.org/ на која можеше да се аплицира до 15. месецов.

Глобалното движење „Младинскиот предизвик“ се одвива во 16 држави во светот. Целта е да се ослободи креативноста и идеите на младите луѓе  со дизајнирање решенија со кои ќе се овозможи да се прекине насилството врз и помеѓу децата (#ENDViolence).  Најдобрите или најветувачките решенија од секоја држава ќе добијат финансирање и менторство, а топ петте решенија на глобално ниво ќе добијат дополнително финансирање и специфично дизајнирана поддршка од партнерите на Generation Unlimited.

Проектот во државава го имплементира СмартАп – Лабораторија за социјални иновации Скопје, а финансиската поддршка ја обезбеди УНИЦЕФ.