Свет
15. October 2019 - 14:38

Хуманитарните работници и новинарите ја напуштаат североисточна Сирија

Странските хуманитарни работници и новинарите денеска во голем број се собраа на граничниот премин Семелка, на границата меѓу Сирија и Ирак, за да ја напуштат сириската територија,  јавија американските медиуми.

Нивното заминување од Сирија се должи на турската офанзива, што почна минатата недела, но и на враќањето на единиците на  сириската влада во регионот, што во последните неколку години беше управан од практично автономните курдски власти, пренесе БТА.

Нестрпливоста на странците да ја напуштат земјата се одразува и преку изненадувачкиот и драматичен крах на аспирациите на сириското курдско малцинство за автономија на регионот. Самата курдска администрација ги покани сириските владини сили во зоната да бидат заштита од турскиот упад на нивна територија.
 
Странците во Рожава, како што Курдите го нарекуваат овој регион, се исправени пред несигурноста за тоа кој во иднина ќе управува со регионот. Доколку  Дамаск си ја поврати контролата, тие фактички во земјата ќе престојуваат нелегално.

И покрај тоа што малку организации имаат издадено официјални соопштенија, се чини дека сите странски хуманитарни работници ќе си заминат. Десетици странски новинари кои известуваат за турската офанзива, исто така, си заминале од страв да не паднат во мрежата на владините безбедносни сили.

Припадник на меѓународна хуманитарна организација на граничниот премин Семелка изјави дека речиси сите 250 странски  хуманитарни работници во североисточна Сирија ја напуштаат земјата.

Курдската администрација се обидува да ја смири загриженоста на странците, сооопштувајќи дека спогодбата за враќање на сириските владини сили е чисто воено прашање, и дека цела администрација ќе продолжи  да работи со вообичаениот ритам, вклучувајќи ја и работата на границата.

Популарно од Свет

Ново на Сител

© 2026 Сител Телевизија