Градската болница „Свети Наум Охридски“ доби нова донација од 50 илјади евра за опрема

Универзитетската клиника по хируршки болести „Свети Наум Охридски“ доби донација од Агенцијата за катастар на недвижности од 50.000 евра која ќе биде искористена за купување опрема.

Оттаму додаваат дека изминатите четири години, вкупно имаат добиено донации во вредност од над еден милион евра, кои Клиниката ги има добиено благодарение на посветената работа и проактивноста на менаџментот на клиниката. Истите се реализирани преку соработка со повеќе државни институции, компании и физички лица, а сите донации се искористени за подобрување на условите и услугите кои се пружат во установата. Од постигнатите резултати може да се види ефикасното менаџирање, а тоа се должи на компактноста на установата и професионалноста на вработените, велат од болницата.

Се додава дека „преку вакви позитивни примери, кои директно влијаат на заштита на општото добро и зголемување на довербата во јавното здравство, ги стимулираат и воедно повикуваат сите други државни институции и компании, како и физички лица, да го следат овој позитивен пример и да се продолжи трендот на донирање средства и соработка со нашата клиника, а сѐ со крајна цел – обезбедување на современи услови за лекување и третман на сите пациенти кои ги користат нашите услуги“.