Голем број посетители во бањата Стрновац

Голем број посетители од Куманово и соседните општини летово ги посетуваат базените со топла вода во Стрновац, општина Старо Нагоричане и покрај тоа што во моментов со бањата не стопанисува општинското комунално претпријатие, информираше градоначалникот на општината, Милован Стојковски.

Бањата ја посетуваат и жители од градовите и населените места од југот на Србија. Советот на општина Старо Нагоричане пред неколку години донесе одлука со бањата Стрновац да стопанисува комуналното претпријатие.

- Годинава имаме проблеми со ликвидното работење на претпријатието. Се надеваме дека многу брзо проблемот ќе се надмине, така што со бањата ќе може да стопанисва комуналното претпријатие, ќе се оддржува, ќе се собира сметот, изјави градоначалникот Стојковски.

И покрај овој проблем, нема осцилации во однос на посетеноста на бањата која привлекува посетители и во есен и зима. Штом комуналното општинско претпријатие ќе го преземе стопанисувањето, влезот во бањата ќе се наплаќа симболични 50 денари.

Термоминералниот извор се наоѓа на три километри од општина Старо Нагоричане, на дваесетина минути од Куманово. Протокот на вода, е 12 литри во секунда, а температурата е константна во текот на целата година и изнесува 39,5 степени целзусови. Водата од Стрновац извира од длабочина од 200 метри природно, без пумпи, а кај корисниците постои верување дека лекува од ревматски и други видови заболувања. Водата во оваа бања за прв пат избила на површина во осумдесетите години од минатиот век и оттогаш наваму масовно ја посетуваат жителите на регионот.