Годишнина од протестите „1 од 5 милиони“, Двери го блокираа влезот во РТС

Во Белград синоќа се одржа 52-от протест „Еден од пет милиони“ со кој се одбележа годишнината од првиот протест во Крушевац, наречен „Стоп на крвавите кошули“, кој беше организиран поради претепувањето на опозицискиот лидер  Борко Стефановиќ во тој град.

Од протестот беше порачано дека „шетањата“ ќе продолжат секоја сабота сè до конечната победа и заминување на сегашниот режим, јави дописникот на МИА.

На патот кон Владата на Србија, протестната колона ја мина зградата на Радио телевизија на Србија (РТС), каде што во тоа време се одвиваше блокада организирана од движењето Двери. Организаторите од камион ги прочитаа барањата до раководството на РТС, од кое беше побарано гостување на  Борко Стефановиќ, после чие тепање и започнаа протести пред една година. Исто така беше побарано и другите опозициски лидери да добијат простор на јавниот сервис.

Во моментот кога од камионот беа читани барањата пред влезот на РТС во улицата Таковска, со факели се појави раководството на Двери, предводено од Бошко Обрадовиќ. Со тоа се заврши, како што беше кажано, „последната блокада на предупредување“.

Колоната со учесниците на протестите „Еден од пет милиони“ потоа продолжи кон српската Влада каде од камионот се слушаше песната на Бајага и инструктори „Пада Влада“, а беше закачена крвава кошула која симболично асоцира на годишнината од нападот врз Борко Стефановиќ.

Еден од организаторите на протестот, Валентина Рековиќ, порача дека ќе падне власта на Александар Вучиќ, која ја нарече банда и картел. Како едно од главни барања, Рековиќ ги потенцираше фер и слободните избори.

На 30 ноември минатата година во Крушевац се одржа првиот протест наречен „Стоп на крвавите кошули, откако една недела претходно беше претепан тогашниот лидер на Левицата на Србија, Борко Стефановиќ, а сега заменик претседател на Партијата за слобода и правда (ССП).