Г.г. Стефан се заблагодари за поддршката и помошта од Бугарија

Поглаварот на Македонската православна црква -Охридска архиепископија г.г Стефан изрази благодарност до Бугарија, премиерот Бојко Борисов и Владата за поддршката и помошта што им ја даваат на православните верници во земјава.

-Благодарам од се срце од името на сите православни верници во Македонија. Благодарам за љубовта со која се однесуваат кон нас бугарската Влада, премиерот и државата, изјави г.г. Стефан за Бгнес по повод одлуката на премиерот Борисов, македонски владика да оди со бугарскиот владин авион во Ерусалим за преземање на велигденскиот благодатен оган.

Премиерот Биросов денеска имал средба со старозагорскиот митрополит Кипријан кој е раководител на Комисијата за регулирање на статусот на МПЦ-ОА што беше формирана кон крајот на 2017 година откако македонската црква и се обрати за помош на бугарската црква. На средбата бил прецизиран начинот на кој благодатниот оган на Велигден  ќе и биде  предаден и на МПЦ-ОА.

Токму старозагорскиот владика Кипријан годинава ќе патува во Ерусалим по благодетниот оган со владиниот авион, а во црковната делегација ќе биде и македонски епископ, по барање на МПЦ-ОА.

Бугарската православна црква првпат благодатниот оган и предаде на МПЦ-ОА минатата година.