Германската вакцина може да се чува во фрижидер до три месеци

Германската биотехнолошка компанија „КјурВак“ објави дека нејзината вакцина против коронавирус може безбедно да се чува во обичен фрижидер до три месеци, што веројатно би помогнало да се избегне голема логистичка пречка кога станува збор за дистрибуција, пренесува „Фокс њуз“.

Компанијата наведе дека нејзиниот кандидат за вакцина базиран на mRNA, CVnCoV, останува стабилен и во рамките на дефинираните спецификации најмалку три месеци кога се чува на 5 Целзиусови степени и до 24 часа како вакцина готова за употреба кога се чува на собна температура.

„Транспортот и чувањето на вакцините за кои се потребни ултра ниски температури за да бидат стабилни, беше предмет на интензивна дебата и загриженост во однос на изводливоста, дополнителните трошоци и расипувањето“, рече д-р Флоријан фон дер Мулбе од „КјурВак“ во соопштението за медиумите.

Тој додаде дека компанијата е многу охрабрена од извонредната стабилност на нивниот кандидат за вакцина против Ковид-19 кога се чува во стандарден фрижидер, како и со примена на собна температура.

„Оваа компатибилност, исто така, потенцијално овозможува децентрализирано складирање и може значително да ги олесни напорите за вакцинација во голем обем за време на тековната пандемија“, додаде Фон дер Мулбе.