Германија и Австрија бараат продолжување на контролата на заедничката граница

Германија и Австрија бараат продолжување на контролата на заедничката граница, имајќи ги предвид актуелните закани за безбедноста, изјавија денеска во Берлин германскиот и австрискиот министер за внатрешни работи, Томас де Мезиер и Волфганг Соботка.

Мезиер истакна дека Германија бара продолжување на рокот за гранична контрола, кој завршува кон средината на следниот месец, поради „недоволна безбедност на надворешните граници на ЕУ“ и опасноста од терористички напади.

Тој нагласи дека средбата на врвот на Г-20, која е закажана за јули во Хамбург, е доволна причина за продолжување на мерките за граничната контрола.

Со воведување на тој режим времено е прекинато спроведувањето на Шенгенскиот договор за слободно движење преку границите на земјите од овој документ, меѓу кои се Германија и Австрија.

Соботка спомена за важноста на економските врски меѓу соседните земји, но дека безбедноста на граѓаните е приоритет. Тој додаде дека Австрија ја поддржува позицијата на Германија.