Гатилов: Мигрантската криза ќе се реши ако се искоренат причините

Заменик-министерот за надворешни работи на Русија, Генадиј Гатилов денеска изјави дека бегалската криза во Сирија може да биде решена само ако се искоренат нејзините причини.

- Русија е загрижена поради состојбата на сириските бегалци чиј број, според извештајот на Високиот комесаријат за бегалци на Обединети нации, се зголеми на пет милиони луѓе, истакна Гатилов на конференцијата за глобална одговорност за сириските багалци, што се одржува во Женева.

Тој додаде дека „мигрантската криза е последица на политиката на мешање во сириските внатрешни проблеми со цел да се дестабилизира државата и да се промени несоодветниот режим“.

Гатилов наведе дека Русија е подготвена активно да учествува во процесот на нормализација на бегалската криза.