„Галските петли“ го сакаат за селектор?!

Каталонскиот спортски весник „Мундо депортиво“ тврди дека тренерот на Реал, Зинедин Зидан, би можел по завршувањето на сезоната да го напушти клубот. Според истиот извор, извесно е дека Зидан ќе ја преземе фудбалската репрезентација на Франција.

 

„Извесно време се врти приказната дека Зидан ќе го наследи Дидие Дешамп на клупата на француската селекција. Од претседателот на Сојузот, па до Рафаел Варан, сите се убедени дека Зидан има сѐ што е потребно за да биде селектор.“

 

Опцијата Зидан да биде селектор постоеше и во минатото, но „Мундо депортиво“ тврди дека тоа ќе се случи по завршувањето на Светското првенство во Русија кога ќе истече договорот на Дешамп.

 

И анкетите што се направени на оваа тема јасно покажуваат дека Французите сакаат Зидан да биде новиот селектор на репрезентацијата. Како што расте поддршката за Зидан, така опаѓа довербата што кај фудбалските фанови и јавноста ја има Дешамп.

 

Во Франција владее мислење дека актуелниот селектор не знае како да го искористи потенцијалот што го поседуваат Мбапе, Гризман и Погба и дека репрезентацијата стагнира уште од финалниот меч на Европското првенство во 2016 година.

 

Зидан одбива да се изјасни по ова прашање, но сите се убедени дека доколку му биде понудено селекторското столче, тој нема да одбие. Од друга страна, првиот човек на реал, Флорентино Перез, порачал дека легендата ќе остане.

 

Она што е најинтересно е дека по мундијалот во Русија, германскиот селектор Јоаким Лев ќе ја напушти селекторската позиција, а токму Германецот е најголемата желба на Перез.