Фудбалската Академија на ФК Вардар ги отвора вратите за младите

 

 Под мотото „Биди и ти шампиони – Биди Вардар“ најтрофејниот македонски фудбалски клуб им овозможува на сите заинтересирани млади фудбалери, генерации од 2002 до 2010 да бидат дел од подмладокот на „црвено-црните“ преку членување во Академијата на клубот.

 

- Со изградбата на новата фудбалска Академија која поседува соодветна инфраструктура, Македонија доби институција за развој на млади фудбалски таленти и со неа може да конкурира со најдобрите во Европа. Стратешки приоритет на фудбалската Академија на ФК Вардар е фудбалскиот и телесен развој на идните врвни вардаровци и репрезентативци. Затоа ги повикуваме младите кои имаат желба да бидат дел од шампионот Вардар, да се запишат во Академијата, информираат од ФК Вардар.

 

Уписите ќе траат од 10 до 31 август, секој работен ден од 9 до 21 часот. Месечната членарина е 800 денари, а тренинзите започнуваат од 1-ви септември.

 

Најталентираните понатаму ќе добијат можност да бидат дел од професионалните групи на фудбалската академија Вардар.

 

ФК Вардар го започна и најголемиот младински проект „Вардар Јуниор лига“. Овој проект има за цел да го поттикне интересот за фудбалот меѓу младите таленти низ цела Македонија, како и да им овозможи на младите соодветни услови за развој при изучувањето на тајните на фудбалската игра, под стручна подготовка на 15 професионални тренери.