Форум: Како да се подобрат состојбите со кршењето на човековите права

Состојбата со човековите права во Македонија не е совршена, но таква е и во други земји. За подобрување се потребни и поголеми финансиски средства, но и поголема свесност, добра волја и ангажираност на сите кои се занимаваат со ова прашање, сметаат учесниците на Форумот за човековите права на маргинализираните групи што се одржа денеска во Скопје.

- Тоа е прашање на кое треба постојано да се работи. Секогаш има нешто што сите ние може да направиме не само да ја подобриме правната рамка, туку да ги подобриме нашите и животите на другите луѓе чекор по чекор, рече Петруш Тоинес Меѓународен лидер на програмата Цивика мобилитас. 

Овој форум, додаде тој, е можност да се види какви се состојбите, што може да се направи и како заедно да се оди напред. 

Претседателката на Институтот за човекови права, Маргарита Цаца Николовска вели дека состојбата со кршењето на правата на маргинализираните групи во Македонија е најтешка, бидејќи, како што рече, нивните права се кршат по неколку основи. 

За подобрување на состојбите, рече, треба да се подигне свесноста за дискриминација или кршењето на правата, а во справувањето да се вклучат и да соработуваат институциите и граѓански организации. Потребни се и луѓе,  кои можат во одредена средина да детектираат што е дискриминација и да се борат против неа.