Формиран Кризен штаб за заштита од пожари во Македонска Каменица

Во насока на заштита на шумите и животната средина, денеска во Полициската станица во Македонска Каменица се одржа координативен состанок со претставници од надлежните институции. На состанокот беше формиран Кризен штаб кој ќе врши 24-часовен надзор на ризичните терени за пожари.

-Ќе се применуваат современи средства како видеонадзор, дрон-технологија и засилена комуникација помеѓу институциите со цел навремено спречување и гасење на пожари. Согласно одлуката на ЈП „Национални шуми“ и Министерството за земјоделство, шумарство и водостопанство, на сила е 24-часовна забрана за движење во шумските подрачја од 1 јули до 31 август 2025 година. Забраната не важи за службени и овластени лица, информираше градоначалникот на Општината, Димчо Атанасовски.

Апелираше до сите граѓани на највисоко ниво на одговорност, совесно однесување и грижа кон природата.

-Само заедно, со внимателност и соработка, можеме да спречиме несакани последици и да ја зачуваме нашата околина безбедна, додаде Атанасовски.

За спроведување на забраната задолжени се ЈП „Национални шуми“, Шумската полиција, МВР и Државниот инспекторат за шумарство и ловство. Непочитувањето на забраната ќе биде казнето со парична казна од 1.500 до 2.000 евра, согласно член 106 од Законот за шумите.